KARNAME

Roja we bi xêr gelî xwînerên malpera Enstîtuya Kurdî ya Stenbolê!

Ji niha pê ve em dixwazin di vî quncikî de we der barê xebatên xwe de agahdar bikin. Enstîtuya Kurdî ya Stenbolê çi karî dike, kîjan bername dane ber xwe, der barê vê yekê de em ê raya giştî û dilxwazên ziman, wêje û dîroka kurdî agahdar bikin.

Her wekî me li ser malpera xwe jî ragihandibû, di 29’ê meha berfanbarê de kongreya me pêk hat. Di kongreyê de rêveberiyeke nû hate hilbijartin. Me di nav saziyên sivîl ên kurd de gaveke pêşeng avêt û di rêveberiya xwe de pergala hevserokatiyê bi cih kir. Di encama hilbijartinê de Samî Tan û Gulseren Yilmaz wekî hevserok; Haci Sayin, Alî Arslan, Gulşen Erdogan, Muzaffer Avşar, Îhsan Akyuz wekî rêveber hatin hilbijartin. Rêveberiya nû di civîna yekemîn de karbeşiya xwe kir û bi endamên xwe re civînek li dar xist. Di vê civînê de ji bo xebatan ev komîsyon hatin avakirin:

Komîsyona hîndekarî û perwerdehiyê

Atolyeyên hînkirina zimanê kurdî ji hêla vê komîsyonê ve têne birêvebirin. Hemû kesên ku wekî mamoste beşdarî atolyeyên zimanê kurdî dibin, wekî endamên Komîsyona Perwerdehiyê hatin destnîşankirin. Her wiha  ji ber ku ji bo bipêşxistina xebatan pêdivî bi perwerdehiyeke domdar heye, me biryar da ku ji bo mamosteyên xwe perwerdehiya navxweyî pêk bînin. Komîsyona perwerdehiyê dê di vî warî de bernameyê amade bike. Wekî pêşniyar jî hate xwestin ku lênûska polê bê amadekirin û materyalên perwerdehiyê dewlemendtir bibin.  Di warê dîtbarî û bihîzyarî de jî hinek materyalên alîkar bêne amadekirin. Ji bilî van tiştan, li ser kovareke fêrkirinê jî xebat didome. Ev kovar dê salê du caran, ji bo şagirt û mamosteyên atolyeyên zimanê kurdî dê bê weşandin.

Ji bilî zaravayên kurmancî û kirmanckî dê ji bo fêrkirina zaravayê soranî jî xebat were destpêkirin. Her wekî tê zanîn der barê kurdan de di arşîva Osmaniyan de gelek belge hene, heta niha hinek xebat li ser van belgeyan hatine kirin, bo nimûne endamê Enstîtuya me birêz Ke Kerem Soylu di vî warî de du pirtûk (Mesail-i Mühimme-i Kurdistan û Osmanlı Belgelerinde Dersim ve Civarı) dan çapkirin.  Her wiha Koma Kurdolojiyê jî di vî warî de xebatê dike û heta niha çend pirtûk dane çapkirin, yek ji van pirtûkan der barê Rojî Kurd de û ji hêla Enstîtuya Kurdî ya Stenbolê ve hatiye weşandin.  Lê belê di vî warî de pêdivî bi xebatên berfireh heye, ji bo vê yekê jî divê mirovên ku dizanin van belgeyan bixwînin deşîfre bikin zêdetir bibe.  wiha dê ji bo xwendina belgeyên bi osmanî jî atoleyeke fêrkirina osmanî were vekirin.

Komîsyona Hişmendiyê

Ev komîsyon dê xebatên mîna serdan, panel, semîner û gotûbêjan li dar bixe, bi vî rengî mijara parastin û pêşvebirina zimanê kurdî bixe rojeva civakê.

Komîsyona Werger

Komîsyona wergerê dê  di warê wergerê de xwe amade bike û di hemû waran de karê wergerê yê ku dikeve aliyê Enstîtuya Kurdî hilgire ser milên xwe.

ZEND

Ji bo weşana Enstîtuya Kurdî ya Stenbolê ZEND ku wekî rêzepirtûk tê çapkirin, desteya weşanê hate diyarkirin. Ji niha pê ve dê kovar di bin çavdêriya vê desteyê de bi edîtoriya Alî Arslan were weşandin.

WEŞAN

Pirtûkên Enstîtuyê ku çapa wan qediyaye û hinek pirtûkên nû yên li gorî xeta weşanê ya Enstîtuyê dê werin çapkirin. Wekî gava yekem dê Hînker Asta 1 di demeke kurt de were weşandin û bigihêje ber destên kesên ku dixwazin vê pirtûkê di xebatên xwe yên hîndekariya ziman de bi kar bînin.

Bi kurtasî em dikarin bi vî rengî dawî li vê nivîsa xwe bînin. Heta nivîseke din bimînin di nav xêr û xweşiyê de.

Li ser navê Desteya Rêveber a Enstîtuya Kurdî ya Stenbolê

Samî TAN (Hevserok)